Bizim saytımıza xoş gəlmisiniz!

«MÜTƏRCİM» — Nəşriyyat-Poliqrafiya Mərkəzi 1993-cü ildən fəaliyyət göstərən «Mütərcim» — Tərcümə Mərkəzinin təsisçiliyi ilə yaradılmışdır. Azərbaycan Respublikasında yaradılan ilk özəl nəşriyyatlardandır. Əsasən tərcümə ədəbiyyatlarının, lüğətlərin, ali və orta ixtisas məktəbləri üçün dərslik və dərs vəsaitlərinin nəşri sahəsində ixtisaslaşmışdır. İldə orta hesabla 100-120 adda kitab nəşr edir. Nəşriyyatın yüksək ixtisaslı kadr potensialı və müasir tələblərə cavab verən maddi-texniki bazası vardır. Nəşriyyatın nəşr etdiyi kitablar öz məzmunu, oxucu auditoriyasını qiymətləndirmək, bədii tərtibat və nəfis çap baxımından həmişə yüksək qiymətləndirilmişdir.
 Nəşriyyat 1999 və 2001-ci illərdə «İlin nəşriyyatı» adına layiq görülmüşdür. Bir sıra respublika və beynəlxalq kitab sərgilərinin nominantı olmuşdur. Müxtəlif kitab sərgi və yarmarkalarda nəşriyyatın çap etdiyi kitablardan A.Hacyevin «Renessansnıy mir «Xamse» Nizami Qyandjevi» — «ən məzmunlu kitab», R.Əkbərovun «İlk tibbi yardım» kitabı – «tibbi biliklərin təbliği», V.Yusiflinin «Tənqid də yaradıcılıqdır» kitabı – «ən yaxşı tənqidi kitab», T.Cəfərovun «Tyrko-slavyanskiye svyazi v literature drevney Rusi» kitabı – «ən yaxşı ədəbiyyat tarixi kitabı», R.Əkbərovun «Povest və hekayələr» kitabı – «ilin satira kitabı», F.Dostoyevskinin «Karamazov qardaşları» romanı (tərcümə edəni Telman Vəlixanlı) – «ilin bədii tərcümə kitabı», «Dilçilik ensiklopediyası» – «ilin filoloji layihəsi», həmçinin «Mütərcim» jurnalı – «ilin tərcümə jurnalı» və s. nominasiyaların qalibi olmuşdur.
 Nəşriyyat respublikanın yaradıcı birlikləri (Azərbaycan Yazıçılar Birliyi, Azərbaycan Jurnalistlər Birliyi, «Sodrujestvo», «Luç», «Yujnıy treuqolnik» və s.), respublikanın və xarici ölkələrin nüfuzlu ali təhsil ocaqları (Bakı Dövlət Universiteti, Bakı Slavyan Universiteti, Azərbaycan Dillər Universiteti, Azərbaycan Dövlət Pedaqoji Universiteti, Azərbaycan Dövlət Neft və Sənayə İnstitutu, əl-Fərabi adına Qazaxıstan Dövlət Universiteti, A.S.Puşkin adına Dövlət Rus Dili İnstitutu, Voronej Dövlət Pedaqoji İnstitutu (Rusiya) və s., elmi-tədqiqat müəssisələri (AMEA-nın Ədəbiyyat, Dilçilik İnstitutları və s.,) Azərbaycan Respublikasının Təhsil İnstitutu, həmçinin xarici ölkələrin bir sıra qabaqcıl nəşriyyat və jurnalları («Zlatoust», «Sputnik+», «RAE», «Rosizdat», «Litera», «Nauka i jizn Kazaxstana» və s.) ilə sıx əməkdaşlıq edir.

«Mütərcim» Tərcümə Mərkəzi filologiya elmləri doktoru, professor Telman Cəfərovun (Vəlixanlı) təşəbbüsü ilə 1993-cü ildə təsis edilmişdir və bu gün də öz işini uğurla davam etdirir. Mərkəz aşağıdakı istiqamətlərdə fəaliyyət göstərir:

  • İstənilən mövzulu mətnlərin xarici dillərdən (ingilis, fransız, alman, ispan, italyan, ərəb, fars, rus, polyak, bolqar, yunan, çex və. s) Azərbaycan dilinə və əksinə keyfiyyətli tərcüməsi;
  • Kitab, broşüra, qəzet və jurnalların nəşrə hazırlanması və çapı;
  • Dissertasiya və avtoreferatların, digər mətnlərin kompüterdə yığımı və çapı;
  • Ali məktəblərin bakalavriat və magistratura səviyyələrinə, Dövlət qulluğuna və müəllimlərin işə qəbuluna hazırlıq.
  • İngilis dili və kompüter kurslarının təşkili.

 Mərkəzdə yüksək ixtisaslı 10 əməkdaş fəaliyyət göstərir.